Василий Павловлан шарнымаш кас

59 1
Фото: sernurlib.ru

              Тиде рвезылан сценышке мурызо семын лекме марте пашам ышташат, армийыште служитлашат логалын. Но рвезе йоршын вес корным ойырен налын. Тыге илыш пӱрымашыже тудым муро тӱняшке конден. Мый Обдасола ялын рвезыже Василий Павлов нерген каласынем.

  Чынак, ялнан лӱмжо веле Обдасола, но вер-шӧржӧ, пӱртӱсшо, калыкше дене ялна кугешна.

Ожнысек изи яллаште иза-шольо, ака-шӱжар семын иленна. Нигунамат ваш обижаен огынал, эре пырля модынна, школышкат пырля чумырген коштынна. Йоча годым чылажат сайын, порын чучын. Эре тыге лиеш манын шонет тунам. Но жап эрта, кугурак лийына. Вара кажныжын шке корныжо, кужу корно. Тиде корным, илышыжым айдеме шке чоҥышаш. Южгунамже йоҥылыш лият гын, от пале, кудо йолташет дек эҥеташ. Виянракше тыгай туткар гыч шкеак лекташ корным муэш, а весылан тидым ышташ нелырак.

Шошо. Пӱртӱс ылыжаш тӱҥалеш. Чыла тӱня помыжалтеш. Ик мотор шошо кечын, 15 апрельыште Василий Павловын шочмо кечыже. Ила гын тений тудлан 60 ий темеш ыле. Родо-тукымжым, йолташыже-влакым ӱстел йырже чумыра ыле. Но чаманаш логалеш, тудо тиде тӱня гыч пеш эр каен колтен.

Туге гынат, таче шочмо кечынже Марисола книгагудышто шарнымаш касым эртарышна. Уна-влакат Йошкар-Ола гыч толыныт. Нина ден Светлана акашт лийыныт. Зина пелашыже толын. Нуно ондак шӱгар ӱмбакыже миеныт, вара книгагудышто лийыныт. Василий нерген презентацийым колышт лекна. Тудым Обдасола ялын ӱдыржо, Маргарита Николаевна Макарова ямдылен. А вара мутым пелашыже Зинаида Васильевна Шакирова нале. «Нет ни в одной галактике души, способной лучший звук издать, чем звуки песни человеческой души…» тыге каласыш тудо. Зина пелашыже Васям муро денат шарналтыш. Васяже тудым чӱчкыдынак «Зинушем, моторем» манеш улмаш. Нуно коктынат романтика шӱлышан лийыныт. Теве могай случай мылам тидын нерген шижтарыш.

Василий Зинажым шочмо ялышкыже, Обдасолаш унала конден, родо-тукымжо дене палыме лияш. Эн ончычак тукымжын кумалме верышкыже, кӱсотыш наҥгаен, Онапу воктене сортам чӱктен, вара сукалтен шинчыныт. Тыге Василий шке тукымжылан Зина пелашыжым ончыктен. Василий Онапу йымалне сортам чӱктен, сукалтен шинчымым ЗАГС деч кӱкшылан шотлен. Садлан пелашыжым ЗАГСыш намиен огыл. Нуно пырля ваш йӧратен илаш Ош Кугу Юмо ончылно, кӱсотышто мутым пуэныт. Кызытат тидым Зинушыже порын шарнен ила да чӱчкыдын ты кундемыш пагален толеш, родо-тукымжо дене вашлиеш, да шижалтеш, Зинан чоныштыжо йӧратымаш ила.

Иктаж кӧжӧ шоналта, ораде. Уке, тудо марий шӱлышан айдеме, волгыдо йӧратымашлан ӱшаныше да шке калыкшым да йӱлажым арален моштышо рвезе. Тудланак книгагудышто Василий Павловлан «Обдасолан талешкыже» выставкым сӧрастарышна.

Альбертина Иванова пеш поро шомак дене шарналтыш: «Тудо чон ден мурен, йӧратыше, пагалыше, волгыдо, ойыртемалтше айдеме муро тӱняште лийын. Калык мурмыжым йӧратен колыштын да кызытат колыштыт. Вася уке манын шоналтем да ом ӱшане. Тыге лийын ок керт». Геннадий Сабанцев ден Валерий Григорьеват шарнымаш касыште Васям сай йолташ лиймыштым ойлышт. Да тудын мурымыжым кӱкшын аклышт. Геннадий Сабанцев почеламутымат лудын пуыш. Зоя Дудинан Василий Павловлан пӧлеклыме «Йӱлен колаш неле» почеламутшо кажнын кумылжым тарватыш. Тудын пуымо поро ойжат мемнам ынде у пашаш нӧлталшаш.

Елизавета Владимировна Марченкова тыге каласыш: «Марий койышан, марий шӱлышан, йӧратен моштен». Да Нина акажлан мурым пӧлеклыш.

Пырля тунемше йолташ рвезыже Вячеслав Дудин поснак порын, оҥайын культпросвет училищыште тунеммыж нерген, Марисола ДК-ште ыштыме пагытше нерген каласкалыш.

А мый шкеже книгагудын озаватыже-влаклан поро шомакем пелештынем. Тау тыланда, кӧ шарнымашышке ушнен. Таза лийза. Вес ганат эре книгагудо пелен лияш кумылда лекше.

                 

 

 



 

 


 

 

 

 
По теме
В Марий Эл продолжается отбор кандидатов для поступления в ведомственные вузы ФСИН России - УФСИН Прием заявок на обучение от кандидатов продолжается. Основные требования, которые предъявляются к абитуриентам: возраст до 25 лет, среднее образование, успешные результаты ЕГЭ и, конечно, состояние здоровья.
УФСИН
Малярия: характеристика и профилактика 29.03.2024 г. Малярия относится к группе паразитарных заболеваний человека, возбудителями которых выступают различные виды малярийного плазмодия,
Роспотребнадзор
Советы путешественникам, выезжающим за рубеж 28.03.2024 г. В странах Евразии, Африки, Южной Америки, Океании с экваториально-тропическим климатом широко распространены инфекционные и паразитарные заболевания,
Роспотребнадзор
фото - Marimedia.Ru В Марий Эл приехала команда тревел-шоу Первого канала «Поехали!». Накануне ведущих Марию Осадник и Евгения Покровского, которые колесят по всей России за рулём своего авто, можно было увидеть на набережной Йошкар-Олы.
Marimedia.Ru